2024-yil 10-dekabr kuni Toshkent tibbiyot akademiyasi Biotibbiyot muhandisligi, informatika va biofizika kafedrasida O‘zbekiston Respublikasi madhiyasining 32 yilligi munosabati bilan yuksak vatanparvarlik ruhidagi tadbir bo‘lib o‘tdi. Tadbirning asosiy maqsadi – talabalar orasida milliy g‘urur, vatanparvarlik va davlat ramzlariga hurmatni mustahkamlash edi.
Tadbir madhiyaning jamoaviy ijrosi bilan boshlandi. Kafedra mudiri kirish so‘zida O‘zbekiston Respublikasi madhiyasining yurtimizdagi mustaqillik, milliy birlik va birdamlik ramzi ekanini ta’kidlab, uning yosh avlod tarbiyasida tutgan o‘rni va ahamiyati haqida so‘z yuritdi.
Tadbir davomida talabalar madhiyaning yaratilish tarixi, uning mualliflari – atoqli shoir Abdulla Oripov va bastakor Mutal Burhonov ijodi haqida qiziqarli ma’ruzalar taqdim etdilar. “Madhiyamiz – davlat ramzi sifatida” mavzusidagi chiqishlarida talabalar madhiyaning nafaqat huquqiy, balki ma’naviy qadriyat sifatidagi o‘rni haqida fikr almashdilar.
Ijodiy qismda talabalar she’rlar, vatanparvarlik ruhidagi qo‘shiqlar va madhiyaga bag‘ishlangan sahna ko‘rinishlari bilan ishtirok etdilar. Badiiy jamoalarning musiqiy chiqishlari tadbirga yanada ko‘tarinki ruh bag‘ishladi.
Tadbir so‘ngida faol qatnashgan talabalar esdalik sovg‘alari va faxriy yorliqlar bilan taqdirlandilar. Yakuniy qismda madhiyaning tantanali ijrosi yana bir bor ishtirokchilarga vatanparvarlik tuyg‘ularini ulashdi.
Bu kabi tadbirlar yosh avlodning milliy o‘zligini anglashiga, tarixiy qadriyatlarga sadoqat ruhida tarbiyalanishiga katta hissa qo‘shadi. Toshkent tibbiyot akademiyasi kelgusida ham talabalar orasida ma’naviy-ma’rifiy ishlarni davom ettirishni rejalashtirgan.
Yashasin mustaqil O‘zbekiston! Barqaror taraqqiyot va yorug‘ kelajak yo‘lida madhiyamiz jaranglasin!
