Toshkent Tibbiyot Akademiyasining Biotibbiyot muhandisligi, informatika va biofizika kafedrasida talaba va o‘quvchilar o‘rtasida tashkil etilgan “Eng yaxshi dasturchi” respublika tanlovi o‘quv jarayonida yangi qirralarni ochib beruvchi muhim tadbir bo‘ldi.
Mazkur tanlov zamonaviy texnologiyalar rivoji va dasturlash sohasida talabalar salohiyatini aniqlash, ularning ilmiy qiziqishlarini rag‘batlantirish maqsadida tashkil etildi. Tadbirda jami 22 nafar talaba faol ishtirok etdi.
Tanlov bir necha bosqichdan iborat bo‘lib, unda ishtirokchilar algoritmlash, dasturlash ko‘nikmalari, muammolarni hal qilish tezligi va innovatsion yechimlar taklif qilish bo‘yicha o‘z bilimlarini namoyish etdilar. Tanlov natijalariga ko‘ra, eng yuqori ball to‘plagan 3 nafar talaba keyingi bosqich uchun saralandi.
“Eng yaxshi dasturchi” tanlovi talabalar o‘rtasida raqobatbardoshlikni oshirish, ularda ijodiy fikrlash ko‘nikmalarini rivojlantirish va amaliy bilimlarni mustahkamlash uchun muhim platforma bo‘lib xizmat qildi. Ayniqsa, biotibbiyot muhandisligi sohasida dasturlashning o‘rni katta bo‘lib, bu yo‘nalishda talabalarni tayyorlashning zamonaviy talablarga mosligi yana bir bor tasdiqlandi.
Tanlovning yuqori darajada o‘tganligi va talabalar tomonidan ko‘rsatilgan bilim va qobiliyatlar akademiya rahbariyati va o‘qituvchilar tomonidan yuksak baholandi. Kelgusida bu kabi tadbirlarni muntazam tashkil qilish va talabalarni qo‘llab-quvvatlash orqali yosh dasturchilarning ilmiy salohiyatini oshirishga katta hissa qo‘shilishi kutilmoqda.
