O‘zbekiston Respublikasi Prezidentining 2024-yil 19-iyuldagi, “Siyosiy qatag‘on qurboni bo‘lgan yurtdoshlarimiz hayoti va faoliyatini o‘rganish, targ‘ib etish hamda ularning xotirasini abadiylashtirish borasidagi ishlarni kengaytirish to‘g‘risida”gi PQ-270-sonli qarori ijrosini ta’minlash, hamda tariximizning noma’lum sahifalarini tiklash va ilmiy nuqtayi nazardan chuqur o‘rganish, inson, uning huquq va erkinliklarini oliy qadriyat sifatida e’tirof etish, shu asosda talaba yoshlarni Vatan taqdiri va kelajagiga daxldorlik tuyg‘usini, fuqarolik pozitsiyasini kuchaytirish, ularni bugungi tinch, erkin va ozod hayotning qadriga yetish ruhida tarbiyalash maqsadida 2024-yil 31-oktabr kuni Toshkent tibbiyot akademiyasi “Biotibbiyot muhandisligi,informatika va biofizika” kafedrasi xodimlari A.Z.Sobirjonov, U.M.Abdujabborova, P.E.Otaxonov, K.D.Latipova hamda 2-Davolash fakulteti 104A-guruh talabalari tomonidan “Jadidchilikning asosiy g‘oya va maqsadlari” nomli ma’naviy-ma’rifiy tadbir o‘tkazildi.
Tadbir kafedra ma’ruza zalida bo‘lib o‘tdi. Tadbirni “Biotibbiyot muhandisligi,informatika va biofizika” kafedrasi katta o‘qituvchisi A.Z.Sobirjonov ochib berdi. Unda tadbir ishtirokchilariga jadidchilik harakatining asosiy g‘oyasi va uni maqsadlari haqida qisqacha to‘xtalib o‘tdi.
XX asr boshlariga kelib Toshkent, Samarqand, Buxoro, Farg‘ona vodiysi shaharlarida o‘nlab jadid usulidagi maktablar ochildi. Jadidlar maktablarda yoshlarni bilimli va ma’rifatli qilib tarbiyalab, ular orqali Turkistonda mustaqil davlat barpo etish uchun milliy davlatchilik g‘oyalarini ilgari surgan. XX asr boshiga kelib Turkistonda jadid ziyolilarining butun bir avlodi, o‘lka ma’naviy-ma’rifiy soha taraqqiyotiga, milliy madaniyatning rivojlanishiga katta hissa qo‘shgan namoyandalari vujudga keldi. Bular Samarqandda Mahmudxo‘ja Behbudiy, Abduqodir Shakuriy, Said ahmad Siddiqiy Ajziy, Toshkentda Munavvarqori Abdurashidxonov, Abdulla Avloniy, Ubaydullaxo‘ja Asadullaxo‘jayev, Buxoroda Abdurauf Fitrat, Sadriddin Ayniy, Fayzulla Xo‘jayev, Farg‘ona vodiysida Hamza Hakimzoda Niyoziy, Obidjon Mahmudov, Abdulhamid Cho‘lpon, Is’hoqxon Ibrat, Xivada Bobooxun Salimov, Polvonniyoz hoji Yusupov va boshqalar edi. Ular vatanparvar, ma’rifatparvar, Turkiston o‘lkasida jadidchilik harakatining asoschilari va rahnamolari hisoblanadi.
Shundan so‘ng 2-Davolash fakulteti 104A-guruh talabalari o‘z chiqishlarini boshladilar.
Tadbir davomida talabalar she’rlardan namunalar o‘qishdi, jadidlarni xalqni ma’rifatini oshirishi yo‘lida qilgan ishlari alohida e’tirof etildi. Sahna ko‘rinishlari ayniqsa talaba va professor xodimlarga juda ma’qul keldi.
Tadbir so‘ngida kafedra dotsenti Sh.T.Xojiyev va U.M.Abdujabbarovalar so‘zga chiqib, tadbir tashkilotchilariga va ishtirokchi talabalarga minnatdorlik bildirishdi.